ادخل و شوف حكاية الحمار نثر شعبى

خرج الحمار للحمير.. زعق النفير
يوم خطبته بينادوا علي كل الحمير
هيقول سيادته النهار ده كلام كتير
نهقوا الحمير و غطي صوتهم ع النفير
ما بين هتاف وما بين نعير و بين شخير
جانا البشير و نعيره منقطع النظير
نهق الحمار .
. صفقت جماهير الحمير
شاور مساعده باللجام
سكتت جماهير الحمير
ما بقاش ف ساحة المؤتمر إلا صوت الخنفرات
قال الحمار
النهاردة راح اعلن لكم سري الخطير
بشرا لقطعان الحمير .. الخير كتير
أنا هأكلكم شعير
اتفقت مع كبير البهايم
رغم البهايم دولة عظمي
بس بيحبو الحمير
و عشان كدة
و حلا لازمة الشعير
هيبيع لنا حصة شعير
تكفي لعلف الدولة
من اكبر مراعي لاصغر حظير
و الصفقة بالقسط المريح .
. صقفت جماهير الحمير
شاور مساعده باللجام
سكتت جماهير الحمير
وقف حمار من الحمير
معروف انه ثوري و بيكلم كتير
بس رد شفخانات من كتر اعتراضه , و من كثر الجعير
بس يا حمارنا الكبير
ليه ما نزرعش الشعير
احنا دولة الحمير
مستقلة عن البهايم
واحنا فينا امكانات
و عندنا احسن خامات
و البهايم مهما كانو دولة عظمي
بيخلطو الشعير بحاجة – تهد حيلنا
و احنا نازلين فيها حش
و الحمار بقي طظ فش
و النتيجة نوم طويل , و يعلا الشخير
احنا راح نزرع شعير
طلعت هتافات الحمير
احنا راح نزرع شعير – احنا راح نزرع شعير – احنا راح نزرع شعير
يا بهايم يا اعدء – انتم جبتو لينا داء
يا زعيمنا يا حمار – بطل بيع احنا احرار
قام مشاور الزعيم
مسكو الحمار اللي قاطع الكبير
و مسكو معاه شوية حمير
و خدو الجميع الي شفخانة التسكيت
عشان في حضرة الكبير ممنوع الكلام
و بالفعل انتهي الشغب , و خدوا اللي شاغب بعيد
و استمر ف الكلام حمارنا الكبير
بس لازم تفهموا ان أغلبكم حمير
وانا عشان اكبر حمار في وسطكم
اعلنت ثورة وانتفاضة ضد اعوان البهايم
و شعاري فيها كان كلام غير مفهوم و عايم
و قلتو فيها ورايا هتافات الحناجر
أرفس عدوك يا مناضل بالحوافر
و عشان تعيش طليق - لازمن تعافر
آن الأوان يبقي الحمار لا يتركب
ولا ينضرب ولا يتشتم ولا يتسحب
انهق بصوت الحق نعر وجعر و صيح
دي الدنيا ما فيهاش معاش إلا للفصيح
نهق الزعيم الحر نهقة صريخ
و شفط مية من جردله الصفيح
أهي شعارات بتطلع كل حين
علشان ينامو و يفضل الحمير حمير
. صقف جماهير الحمير
شاور مساعده باللجام
سكتت جماهير الحمير
و شكرا ليكم
....
خمن مين هما الحمير؟