عشـان إنت مصــري لازم تعاني
وتفقـد كرامتــك بكـل المعــــــانى
وتحرق فى دمك سنين مش ثوانى
وإوعــى تصـــدق كـــلام الأغانـــى
بتـــاع الحضـــاره وكانـــى ومانـى
ده كله هجايـــص ومايدخـــل ودانى
عشان إنت مصرى العذاب بيناديك
بتبدأ فى يومك حاجات بترازيــــك
فى نومك فى قومك تعكـــنن عليـك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملــــزق وريحتـــك عاديــــك
! فتلبــس وتنــزل وفيــك اللــي فيـــــك
ورايح لشغـلك حتحتـــــــاج مواصله
آدي المترو واقف وكهربتــــه فاصله
وفى الميكروباص فى خناقه وحاصله
و أوتوبيس فرامله عايزالهـــا وصله
والتوك توك ده تايه ومحتاج لبوصله
بتوصــل لشغــلك بــــدم إتحــــرق
فى زحمــه وكتمــه وحــر وعــرق
رئيســـك سايبــــلك كومـــــه ورق
ده غير دمغه ضايعه وملف اتسرق
وفى كــام مواطــن عامل لك قلـــق
بيشــكى تقـــول له روح اندعـــق
وعركه وهــــوجه وشاى اندلــــق
ومخك خــلاص من الصداع اتفلق
هترجع لبيتك ده لو كان فى بيـت
هتوصل هتندم ياريتك ماجيــــــت
مراتك بتصرخ خـــلاص استويـت
عيــــالك بتطلب وهات كيت وكيت
تزعــــق تهاتــى يانــاس اتهريــت
ولا حــد سامعـــك مهمــا هاتيــت
عشـان إنت مصــري وده للأسف
فـــلازم تآسي تعيـــش تتقـــرف
وكل الأساسى فى حياتــك تــرف
فتنسى الكرامـه وتنسـى الشــرف
وتســرق وتنصــب أو تنحـــــرف
ودمعــك بيجــري وجرحــك نــزف
مش إنت آللي مصري ؟؟؟ جتك القرف
سوزان قالـــــــت
***
قالـت جــوزى فـــل الفـــــل
غصبـن عن عيـن كل الكــل
راكـب فوقكـم ومالـوش حــل
مهمــا حقـدكـو زاد أو قـــــل
قاعـد قاعـد وحيوريكوا الـذل
قالـت جــوزى بصحـــه شديــــده
كـــل الأمـــراض عنـــه بعيــــــده
وحيحـكمكــم فتــــره جديــــــــــده
وإحنا حنفضــل عيـلـــه سعيـــــده
وإنتو حتبقو مفلسين على الحديـده
قالت جوزى صحته بمـــب
رغـم الشعـب ولاد الكلــب
حتى ولو مكروه من القلـب
لا يهمنا كرهكـوا ولا حـب
عايـزيـن نحكـم مش نتحـب
قالت جــوزى عــال العــال
رغـم كلامكـوا آللـي بينقــال
مـش حيسيـب الحكـم محـال
!!! وإن جـه فكـر يــوم يتحـال
حيـورثكـم لإبنـه جمــال
الأحد يونيو 07, 2009 9:56 pm
